Yangiliklar
Qozog‘iston O‘zbekiston bilan transchegaraviy suvlar bo‘yicha bitimni ratifikatsiya qildi
Hujjat umumiy suv resurslaridan kelishilgan holda foydalanish va davlatlararo ahamiyatga ega suv xo‘jaligi inshootlarining xavfsiz ekspluatatsiyasini nazarda tutadi. Kelishuvlarni amalga oshirish uchun tomonlar suv obyektlarini boshqarish masalalari bilan shug‘ullanuvchi qo‘shma hukumatlararo komissiya tuzadilar.
Bitim 2025-yil 15-noyabr kuni Toshkent shahrida O‘zbekiston va Qozog‘iston Oliy davlatlararo kengashining ikkinchi yig‘ilishi doirasida imzolangan. Hujjatning ratifikatsiya qilinishi suv taqsimoti bo‘yicha ikki davlat o‘rtasidagi muvofiqlashtirishni mustahkamlashi, kelishmovchiliklar xavfini kamaytirishi hamda Sirdaryo va u bilan bog‘liq suv xo‘jaligi obyektlariga qaram hududlarning suv ta’minoti barqarorligini oshirishi kutilmoqda.
Eslatib o‘tamiz, avvalroq O‘zbekiston va Qozog‘iston Sirdaryoning transchegaraviy uchastkalarida suv hisobini yuritish uchun o‘nta avtomatlashtirilgan gidropost o‘rnatishga kelishib olgan edi. Har bir mamlakatda beshtadan shunday post o‘rnatiladi.
Manba
