Tashkent Water Week 2026” Xalqaro forumi

Matbuot relizlar

Tashkent Water Week 2026” Xalqaro forumi

“Tashkent Water Week 2026” Xalqaro forumi 2026-yil 25–26-mart kunlari O‘zbekiston poytaxti Toshkent shahrida bo‘lib o‘tadi.

Forum O‘zbekiston Respublikasi hukumati tashabbusi va O‘zbekiston Respublikasi Suv xo‘jaligi vazirligi, Iteca Exhibitions xalqaro ko‘rgazmalar kompaniyasi, “Toshkent irrigatsiya va qishloq xo‘jaligini mexanizatsiyalash muhandislari instituti” MTU hamda Progressiv islohotlar markazi ko‘magida tashkil etildi.

Forumning asosiy mavzusi: “Suv resurslarini boshqarishda texnologiyalar va innovatsiyalar. Markaziy Osiyo va global suv sikli”.

Markaziy Osiyo iqlim o‘zgarishi va suvga bo‘lgan talabning ortishi tufayli suv tanqisligining ortib borayotganiga duch kelmoqda. Shu bilan birga, aholi, sanoat va iqtisodiy rivojlanish ehtiyojlarini qondirish uchun suvga bo‘lgan talabning ortishi suv infratuzilmasiga bo‘lgan bosimni oshiradi va suv resurslarini samaraliroq va oqilona boshqarishni talab qiladi.

Bunday sharoitda suv resurslarini samarali va barqaror boshqarish strategik ustuvor vazifaga aylanib bormoqda, bu mintaqaviy hamkorlikni mustahkamlashga va Markaziy Osiyoning global suv aylanishidagi roliga bevosita ta‘sir ko‘rsatmoqda. Ushbu muhim resursni samarali boshqarish uchun bir qator chora-tadbirlarni ishlab chiqish zarur. Mintaqa mamlakatlarida qishloq xo‘jaligi sug‘oriladigan dehqonchilikka asoslangan bo‘lib, bu zamonaviy suv xo‘jaligi usullarini joriy etishni talab qiladi. Aholini yuqori sifatli ichimlik suvi bilan ta‘minlash ham shu darajada muhim rol o‘ynaydi.

Bugungi kunda Markaziy Osiyoda suv shunchaki resurs emas, balki mintaqadagi mamlakatlarning iqtisodiy barqarorligini belgilovchi strategik omil bo‘lib, ular hozirda suv resurslarini birgalikda boshqarishning samarali modellarini izlamoqda.

O‘zbekiston Hukumati tomonidan tashabbus ko‘rsatib va birinchi marta ushbu formatda tashkil etilgan Forum tajriba almashish, innovatsion yondashuvlarni muhokama qilish va suv resurslarini boshqarish bo‘yicha qo‘shma strategiyalarni ishlab chiqish uchun noyob imkoniyat yaratadi. Ishtirokchilar suv ta‘minotidagi texnologik va raqamli innovatsiyalar, suv resurslarini boshqarishdagi global tendentsiyalar va asosiy muammolar, oziq-ovqat xavfsizligida suvning roli va tarmoqlararo hamkorlikni rivojlantirish, yashil standartlarni joriy etish, yerlardan oqilona foydalanish, inson kapitalini rivojlantirish va suv xo‘jaligi sohasi uchun malakali kadrlar tayyorlash kabi masalalarni ko‘rib chiqadilar.

Forum dasturi 16 ta sessiyadan iborat bo‘lib, ularda quyidagi 19 ta mamlakatdan 80 ta spiker va 1 200 dan ortiq delegat ishtirok etadi: Avstriya, BAA, Buyuk Britaniya, Finlyandiya, Fransiya, Germaniya, Italiya, Niderlandiya, Qozog‘iston, Rossiya, Saudiya Arabistoni, Shveytsariya, Shvetsiya, Slovakiya, Tojikiston, Vengriya, Xitoy, O‘zbekiston.

Umuman olganda, forum dasturi professional hamjamiyatning barcha darajalarini — hukumat vakillari va xalqaro tashkilotlardan tortib biznes, ilmiy hamjamiyat, yosh mutaxassislar va tadqiqotchilargacha — birlashtirgan keng qamrovli platforma sifatida ishlab chiqilgan bo‘lib, fan, amaliyot va biznes o‘rtasidagi sinergiyani ta‘minlaydi hamda ilmiy ishlanmalarni real sanoat yechimlariga samarali joriy etish uchun sharoit yaratadi.

Forum “Suv va barqaror rivojlanish: muloqot, ishonch va qo‘shma yechimlar” deb nomlangan yalpi majlis bilan ochiladi, unda tadbirning strategik kun tartibi belgilab beriladi. Muhokama davomida ishtirokchilar iqlim o‘zgarishi sharoitida xalqaro hamkorlik, suv infratuzilmasini modernizatsiya qilishda xalqaro moliya institutlarining roli va oziq-ovqat va ijtimoiy xavfsizlikni ta‘minlashda suv resurslarining ahamiyati kabi masalalarini ko‘rib chiqadilar.

Forumning asosiy siyosiy tadbiri mintaqa mamlakatlarining vazirlari va tegishli idoralar rahbarlarini birlashtirgan “Vazirlar muloqoti” strategik majlisidir. Muhokama yuqori va quyi oqimdagi davlatlarning manfaatlarini uyg‘unlashtirish, suv resurslarini birgalikda rejalashtirish va monitoring qilish, gidrologik ma‘lumotlarni almashish hamda mintaqaviy suv xavfsizligi va barqaror rivojlanishni mustahkamlash maqsadida qurg‘oqchilik va suv toshqinlari kabi iqlim xavflarini boshqarish bo‘yicha muvofiqlashtirilgan chora-tadbirlarni ishlab chiqishga qaratilgan.

Alohida sessiyalar aholini ichimlik suvi bilan ta‘minlash, shuningdek, mintaqadagi suv resurslarining eng yirik iste‘molchisi bo‘lgan qishloq xo‘jaligi sohasida suvdan samarali foydalanish masalalariga bag‘ishlanadi.

Inson kapitalini rivojlantirishga katta e‘tibor qaratilmoqda. Forum do‘irasida suv xo‘jaligi sohasi uchun yuqori malakali mutaxassislarni tayyorlash, jumladan, fan, ta‘lim va amaliyotni integratsiyalash bilan bog‘liq masalalar ko‘rib chiqiladi.

Dasturning alohida yo‘nalishi — suv xo‘jaligi sohasida ayollarning rolini rivojlantirishdir. Xalqaro suv resurslarini boshqarish instituti (IWMI) kabi xalqaro tashkilotlar bilan hamkorlikda amalga oshirilayotgan “Women Water Week” tashabbusi yetakchilik, kasbiy rivojlanish va ayollarning sohadagi ishtirokini oshirish masalalariga bag‘ishlanadi.

Dasturning muhim qismi — suv xavfsizligiga bag‘ishlangan bo‘lim. Ikkinchi kuni “TIQXMMI” MTU hududida “Bilimdan amalgacha: Markaziy Osiyoda suv xavfsizligini ta‘minlash uchun suv fanlari va siyosatini uyg‘unlashtirish” mavzusida Toshkent forumi bo‘lib o‘tadi.

Mintaqaning eng dolzarb muammolaridan biriga bag‘ishlangan Xalqaro suv forumi mintaqaviy va global suv kun tartibiga oid masalalarni hal qilish bo‘yicha kelgusi hamkorlik, muvofiqlashtirish va amaliy tavsiyalar ishlab chiqishga turtki berishga qaratilgan.